الكهربا قاطعة، والدنيا شوب

Posted: October 20, 2010 in بالغزّاوي

تنويه: الكلام المكتوب في هذا التدوين قد يعرضك لحالات البكاء او الهبل. ازا انت من اصحاب القلوب الضعيفة او حتى القوية، توكّل على الله واقرأ

ما في احلى من الصراحة، مع انها بتجرح او بتزعل بس اول عن اخر اريح من جميع النواحي. حبل الكذب قصير لو بده يلف الكون مليون مرة.

زمان، كان الشتا يبدا في اخر شهر سبتمبر، تيجي مطرة الصليبة عشان الزتون، وبعدها ببدا البرد الصح ويا نيّال اللي بحب الشتا. هي شهر اكتوبر عده خلص والدنيا برة شوب تقول كأنك قاعد في ساونا

المشكلة مش مشكلة شوب، المشكلة انه الجو نار. يعني بدك تروح عالجامعة الصبحيات بتفرفش وبتفرح على حالك شوية وبس توصل الجامعة الله يكون بعونك، لا في تكييف ولا في تهوية في القاعات، وياريت بس على قدر هيك. بتيجي تقعد في محاضرة متطلب او مادة طلابها كتار ويجي يقعد جنبك واحد من اللي بتحمم مرتين في السنة، مرة عشان عيد الفطر ومرة عشان عيد الاضحى، طبعا اللي صار معه هيك موقف بعرف كيف الوضع مزري ومقرف لدرجة لا توصف

خلصت المحاضرة وبدك  تروّح عالبيت، طبعا كل الجامعة مروحة معك وكل الناس بتركب الا انت. وبتروح على الناس اللي ساكنة في الشجاعية، اللي بضلو واقفين تحت الشمس بالساعة واكتر عشان يركبو لهناك الا ازا ركب سيارة للساحة ومنها للشجاعية وما اظنش في حد بعمل هيك خصوصا ابو مواصلتين

وصلت البيت وحالتك حالة، ميّت من الجوع والطبيخ مش عاجبك او ما بتحبه، شوبان وعرقان كأنك نازل في البحر تسبح بأواعيك وراجع عالبيت بنفس الاواعي تيجي تشغل مروحة عشان تبرّد على حالك شوية. تضوي التلفزيون تقعد نص ساعة على الاقل تلاقي محطة زي العالم والناس تفتح عليها تتسلّى وانت بتاكل “سندوش دقّة” ويا سلام مع حبة بندورة اللي الكيلو تبعها صار ب8 شيكل، بدل ماهو ال8 كيلو ل10 شيكل. والله زمن! ونقشت معاك ياللي بترزع بندورة وبتبيع!!

بيجي اعلان ظريف خفيف بنعاد الف مرة خلال البرنامج التلفزيوني اللي حضرتك بتحضره. ولا الكهربا بتقطع، روح زي الاسد شغّل المولد عشان تتهوّى صح بدل ما انت قاعد في الشوب. طيب المولد صغير، بدي اتحمم والمية بدون مضخة ما بتيجي قوية انك تتحمم فيها، طيب والعمل يعني؟ اضل بقرفي وريحتي طالعة لوقتيش؟

شوية وترجع الكهربا! الحمد لله الف مرة، تروح تفتح الكمبيوتر تشوف ايش صار في الدنيا ولا تحكي مع حد من هالشباب المغتربين او تحكي مع “الجو” وساعتها مين قدك ياعم يادوب لسا بتفتح الكمبيوتر ولا الكهربا بتقطع “ايييييييييييييييييه” وبعدين مع هالشغلة. اصبر انت شفت حاجة لسا؟ والله لينشف ريقك قبل ما نجبلك الكهربا زي الناس. بعد دقيقتين من السب والشتم بتيجي الكهربا كمان مرة، بتفتح الكمبيوتر يادوب ثواني وبتقطع الكهربا تاني كأنه الكهربا مبرمجة تفطع بس تضوي الكمبيوتر. شوية والكهربا راجعة، قاطعة، راجعة، قاطعة، راجعة، قاطعة الفين مرة في الساعة. اجت الكهربا .. استنّا شوية بلاش تقطع .. لا خلص يارب اضلها جاية. بتفتح الكمبيوتر كمان مرة تتفاجأ انه الكمبيوتر ضرب، تبدا ساعتها تنهال على شركة الكهربا واللي قطع الكهربا بالسب والشتم واللعن بتخليش حدا من عيلته الا بطوله لسانك.

بتاخد الكمبيوتر على واحد يشوفلك ماله، برجع بقلك “والله ياعمي الميموري عندك خربانة وبدك تركب ميموري جديدة” بتروح بتركب ميموري جديدة حقها الشئ الفلاني ويا ويلي يا ويلي خربت الميموري وكلفتني بقرة جحا

هادي حالة من الحالات اللي بتصير مع كتير من الناس، وما اعتقد ما صارت مع حد. بدك تقلي انا عندي لاب توب وما بتفرق لو قطعت الكهربا؟ طيب لو فقع الشاحن وبدك واحد جديد وما لقيت شاحن في البلد ولا بتعرف حد تقدر تخليه يجيبلك ياه من برة؟ يبقى راحت عليك! في ناس انخرب بيتها وانحرقت بيوتها من ورا الكهربا اللعينة، غير اللي انحرقت اجهزتها المنزلية: تلفزيون، تلاجة، غسالة، كمبيوتر، زفت، اي حاجة بتنشبك بالكهربا بتخرب

انا واحد من الناس بحب ادلل حالي بالتكنولوجيا الموجودة في العالم، اخلي حياتي عملية اكتر وسهلة اكتر. اشتريت لاب توب وكلفني 1620 دولار من كم شهر، انحرق الشاحن عشان حضرة الملاعين بلعبو في الكهربا كتير قاطعة جاية قاطعة جاية قاطعة جاية واييييييييييييييييه ولكم قرفتوني يا بتيجيو كهربا زي العالم والناس يا بتخلوها قاطعة وجميلتكم على حالكم. انا مواطن ملتزم وبدفع الفاتورة اول بأول ليش بتقطع عني؟ طيب الكهربا يادوب بتيجي ليش بتوصل 300 شيكل؟ وقلنا طيب مش مشكلة بسيطة ازا على قدر الشاحن الحمد لله اللي اجت فيه! صلحت الشاحن، بعد بكم يوم الكهربا بتقطع وبتيجي بسرعة، ولحظة ما تيجي الكهربا وانا بسمع “بووووووووووووووووم” طبعا صوت انفجار وطلعت ريحة، رحت اجري عالغرفة اشوف ايش الدعوة، ولا الاب توب بدخن! طارو 1620 دولار في الهوا عشان الملاعين الحثالة. قلت وعسى ان تكرهوا شيئاً وهو خيرٌ لكم الحمد لله، هادا بلاء واختبار من الله. واللي بصبر بنول.

قلت لحالي بستعمل الكمبيوتر التاني اللي انا اصلا جايبه للألعاب وبهيك انا صرت عبد للكهربا لما تيجي برتبط مع العالم الخارجي، لما تقطع بضل استناها تيجي تاني. الكهربا والحمد لله والشكر الف مرة بتقطع وبتيجي كل مرة بترمش فيها عينيك! صبّحت اليوم الصبح بفتح الكمبيوتر شوية ولا الجهاز بعيد التشغيل، تبّعت ورا المشكلة، وخايف من الحقيقة، خايف تكون الميموري بدت تضرب. يا اللـــــــــــــــــــــــــــــــــه بس ليش هيك بس؟

انحرق اللاب توب وقرّب الكمبيوتر ينحرق كمان، انحرق انا كمان بالمرة ولا كيف النظام؟

 

بعين الله.

 

Nader K.

 

Comments
  1. هههه
    الفلوس بتروح وتيجي , اهم حاجه سلامتك :))

  2. Amoona E. says:

    تنويه: الكلام المكتوب في هذا التدوين قد يعرضك لحالات البكاء او الهبل. ازا انت من اصحاب القلوب الضعيفة او حتى القوية، توكّل على الله واقرأ
    –> LOL

    I feel you Nader… thanks for this harsh but sincere post. Allah y3eenak.

  3. heheheheh I couldn’t but laugh! So funny! I liked your sense of humor🙂

  4. الكهربا قاطعة، والدنيا شوب…

    تنويه: الكلام المكتوب في هذا التدوين قد يعرضك لحالات البكاء او الهبل. ازا انت من اصحاب القلوب الضعيفة او حتى القوية، توكّل على الله واقرأ ما في احلى من الصراحة، مع انها بتجرح او بتزعل بس اول عن اخر اريح من جميع النواحي. حبل الكذب قصير لو بده يلف الكون …

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s